MLC, kailangan nga ba ng Marinong Pilipino?

Mainit ngang usap usapan ngayon sa industriya maritima ang napipintong pagbabalik ng Management Level Course (MLC) at Operational Level Course (OLC) para sa mga marino. Matatandaang Mayo ng nakaraang taon nang ianunsyo ng Maritime Industry Authority (MARINA) na noo’y nasa ilalim ng pamumuno ni MARINA Administrator VAdm. Robert Empedrad, na hindi nga kabilang sa Mandatory Training Courses ng mga marino ang MLC for Marine Deck and Engine Officers, gayundin ang OLC.

Ayon sa MARINA Advisory No. 2021-23, binigyang diin ng MARINA na alinsunod sa STCW Circular 2018-02, nakasaad rito na hindi kabilang ang MLC, OLC, maging ang ETO at ETR sa mandatory training courses.

Maraming marino ang tila nakahinga ng maluwag sa balitang ito. Ngunit kamakailan lamang ay umugong ang bali-balitang sa ilalim ng bagong pamumuno sa MARINA ay muling magiging mandatory ang nasabing mga kurso.

Ang MLC

Nagsimulang buohin ang MLC noong 2008, sa layuning mas dumami at mahikayat ang mga marinong Pilipino na maging opisyal sa barko. Ito ay isa sa mga naging hakbang ng noo’y maritime stakeholders at Department of Labor and Employment (DOLE) Labor Secretary Arturo Brion. Ani Brion, makakatulong ang MLC para mahubog ang mga marinong Pilipino at manatili ang Pilipinas bilang pangunahing pinagkukunan ng dekalibreng mga marino.

Sa isang ekslusibong panayam naman ng Tinig ng Marino DigiTV kay Capt. Edgardo Flores, General Manager ng Eastern Mediterranean Maritime Limited, nagpahayag si Capt. Flores ng kanyang pananaw hinggil sa nasabing kurso, aniya nagsimula ito sa nakita ng EMSA na kakulangan ng Pilipinas pagdating sa edukasyong maritima.

“During the visit kasi dito ng IMO and EMSA, during the early years, sinasabi nila na kulang yung education natin. Na hindi ina address yung management level, meaning sa taas kasi puro OIC lang e. Kaya nakita ko rin na isa iyon sa reason kaya hindi maka move agad yung ating mga OIC kasi wala silang formal education pagdating doon sa management level.”

Gayunman, ayon kay Capt. Flores walang anumang nabanggit sa STCW Convention hinggil sa MLC.

“Now, ano ‘tong MLC? Kasi nung pumunta dito yung EMSA, nakita nila iyon sa school. Sa school nila nakita na kulang. Tapos nung nag report daw tayo dapat ang iri report natin nakalagay na sa school. Pero nung nakita ng EMSA na wala sa school naging training findings na naman. Kaya dapat yung MLC, inilagay iyon sa education. So malinaw nung 2013, nung pumunta sila dito at sa final report nila nung 2014 na ibinigay sa Pilipinas, sinabi sa EMSA report na MARINA and CHED agreed that by the end of 2013, to amend the programs required for certification of operational level BSMT and BSMarE and Management Level MLC in Deck and Engine. The objective of the amendments was to complete the incorporation of 2010 Amendments to the STCW Convention and Code into the program to re-arrange their content. The rearrangement considered in introducing some management level Knowledge, Understanding, Proficiency (KUPs) sa BSMT saka sa BSMarE. Maliwanag. Dun dapat i-include ang MLC. So, and then MARINA and CHED promised na it will be re-arranged and redesigned. Following the relevant IMO Model Courses. So ibig sabihin talagang dapat sa edukasyon, bakit ginawang training?,” kuwestiyon pa ni Capt. Flores.

Ani pa ng Kapitan, hindi umano sa hindi siya sumasang ayon sa pagbalik ng MLC ngunit dapat ay ayusin ang mga paksang tatalakayin sa nasabing kurso.

“Dun sa training yung tinuturo doon sa MLC, pareho din ng tinuturo doon sa school. So ibig sabihin redundant. Halimbawa, ako kapitan, kailangan ko pa bang balikan yun e kapitan na nga ako e. Ang kailangan ko higher education than that kasi that is a classroom instruction. Yung MLC is for school. Sa school mo gawin, pero hindi rin ako disagree kung mago-offer kayo ng MLC, dapat on a higher note. Na hindi yung pang school kung hindi iyong talagang pang barko. Itong itinuturo pang school e. Yung pang barko. Pang barko dapat.”

Dagdag pa ni Capt. Flores, hindi umano seryosong kurso ang MLC para sa mga nagtutulak sa pagbabalik nito bilang mandatory.

“It’s not a serious course, it’s not a serious upgrading course. Sasabihin nila, i-mandatory kasi hinahanap ng authorities daw yan. Pero bakit pumapayag sila ng non-attendance? Yung mga training center, walang attendance. Pagka-kapitan ka hindi ka na pakukunin kasi kapitan ka na daw. So ibig sabihin hindi talaga sya kailangan sa’min, tama ba? May additional na bayad, non-attendance. So, serious ba yun? Serious training ba yun? So marami rin na uma-attend, meron nga isang training center, nasa luneta may booth pa sila dun, nago offer ng non-attendance. Harapan yun. You see, so yun ba ay serious training? Di ba hindi?” pagdidiin pa ng kapitan.

Dahil sa napipintong pagbabalik bilang mandatory ng MLC, muling nabuhay ang usapin sa industriya kung makakatulong nga ba ito para sa pagpapaunlad ng kasanayan ng marinong Pilipino o magiging dagdag lamang ito sa pahirap sa kanila.

Alinsunod sa MARINA Advisory no. 2021-23, na naglilinaw ng hindi pagiging mandatory ng nasabing kurso, malinaw din ang naging kagalakan ng mga marino rito. May ilang nagsasabi na tila ginagawa na lamang silang ‘gatasang baka’ ng gobyerno sa pamamagitan ng kabi-kabilaang mga training na ito, tulad ng MLC na umaabot sa P25,000 hanggang P40,000 ang isang buong kurso.

Kung kaya naman ang anunsyong hindi na ito mandatory ay nagbigay galak sa mga marino lalo na sa mga nagbabalak nang kumuha ng kanilang Certificate of Competency (COC).

Ngunit sa kasalukuyan, sa ilalim ng bagong pamumuno sa MARINA, at sa unang ratsada ng isyung ito ng pagbabalik ng mga kursong tinuring nang hindi mandatory, ano nga kaya ang maaring asahan ng marinong Pilipino?

Related